తెలంగాణ రాష్ట్రం అభివృద్ధిలో నెంబర్ వన్‌గా నిలిచిందన్నారు. ప్రస్తుత తెలంగాణ రాష్ట్రంలో 24 గంటల ఉచిత విద్యుత్, కాళేశ్వరం నీళ్లు, మిషన్ భగీరథ, మిషన్ కాకతీయ, రైతుబంధు, రైతుబీమా, కళ్యాణ లక్ష్మి, షాదీ ముబారక్ లాంటి సంక్షేమ పథకాలు విజయవంతంగా అమలు అవుతున్నాయంటే దీని వెనుక సీఎం కేసీఆర్ శ్రమ ఎంతో ఉందన్నారు. ఆ పథకాల వల్ల తెలంగాణ గతంలో ఎన్నడూ లేని విధంగా మారిందన్నారు.

మరోవైపు కాంగ్రెస్, బీజేపీలపై నిరంజన్ రెడ్డి ఆగ్రహం వ్యక్తం చేశారు. రాష్ట్రంలో రైతులు బాగుపడుతుంటే కాంగ్రెస్, బీజేపీ పార్టీలు ఓర్వలేక పోతున్నాయన్నారు. రైతులు కేసీఆర్‌ వెంట ఉంటే తాము ఎన్నికల్లో గెలవలేమని విపక్షాలకు అర్థమైందన్నారు. మరోవైపు ఇప్పుడు గ్యారెంటీ కార్డులు ఇస్తున్న కాంగ్రెస్ పార్టీ గతంలో ఆధికారంలో ఉన్న సమయంలో రైతులకు ఇలాంటి పథకాలు ఎందుకు అందుబాటులోకి తీసుకురాలేదని మంత్రి ప్రశ్నించారు. కాంగ్రెస్ కాకమ్మ కథలు రైతులకు తెలుసన్న ఆయన.. ఆ పార్టీ ఆరు కాదు కదా.. 20 గ్యారెంటీ కార్డులు ఇచ్చినా విజయం సాధించలేదని పేర్కొన్నారు.