జనగామను వంద శాతం అభివృద్ధి చేస్తాం..
”నాకు రైతుల కష్టాలు తెలుసు. అందుకే రెవెన్యూ అధికారుల చేతిలో ఉండే అధికారాలను రైతుల చేతిలో పెట్టాను. రైతు వేలిముద్ర ఉంటే తప్ప భూమి జోలికి ఇంకెవరూ పోకూడదనే ధరణి పోర్టల్ తీసుకువచ్చాం. అటువంటి ధరణి పోర్టల్‌ను తీసేసి బంగాళాఖాతంలో వేయాలని విపక్షాలు అంటున్నాయ్‌. రైతుల మీద మళ్లీ అధికారులను రుద్దాలని ఆలోచిస్తున్నాయి. ధరణి పోర్టల్‌ వద్దంటున్న, వ్యవసాయానికి 3 గంటల కరెంటు చాలంటున్న కాంగ్రెస్ నేతలను బంగాళాఖాతంలో కలపండి. తెలంగాణ రాష్ట్రం సాకారం కాకముందు కొన్ని జిల్లాలకు వెళితే కళ్ల వెంట నీళ్లు తిరిగేవి. రాష్ట్రంలో ఇప్పుడా పరిస్థితి లేదు. కరెంట్‌ కష్టాలు లేవు. నీటి కొరత లేదు. పంటలు బాగా పండుతున్నాయి. ఎక్కడ కరువు వచ్చినా.. జనగామలో మాత్రం రాదు. రాష్ట్రం ఏర్పడ్డాక.. భువనగిరి, జనగామలు గ్రోత్‌కారిడార్లు అయ్యాయి. దేవాదుల, కాళేశ్వరం నుంచి నీళ్లు రాబోతున్నాయి. వందకు వంద శాతం జనగామ అభివృద్ధి జరిగి తీరుతుంది. జనగామలో ఏం జరగాలనుకున్నామో.. అవన్నీ జరుగుతాయి. ఎన్నికలప్పుడు వచ్చి కొందరు ఆపద మొక్కులు మొక్కుతుంటారు. అలాంటి వాళ్లను నమ్మొద్దు. బీఆర్ఎస్ మేనిఫెస్టో ఓట్ల కోసం కాదు. అబద్ధాల మేనిఫెస్టో పెట్టాల్సిన అవసరం బీఆర్ఎస్‌కు లేదు. తెలంగాణలో పరిస్థితులు మెరుగుపడడంతో పెట్టుబడులు భారీగా వస్తున్నాయి. రాష్ట్రంలో సకల వర్ణాల ప్రజలు సుఖశాంతులతో ఉన్నారు. అన్ని మతాల వారు కలిసిమెలిసి జీవిస్తున్నారు. ఇలాంటి సమయంలో మతాల పేరిట చిచ్చు పెట్టే వారికి ఏ కొంచం కూడా అవకాశం ఇవ్వొద్దు” అంటూ జనగామ సభకు విచ్చేసిన ప్రజల్ని ఉద్దేశించి సీఎం కేసీఆర్ ప్రసంగించారు.

భువనగిరికి ఐటీ పార్కులు తీసుకొస్తాం..
”గత కాంగ్రెస్‌ ప్రభుత్వం భువనగిరిలో అరాచక శక్తులకు అండగా నిలిచింది. కాంగ్రెస్‌ పెంచి పోషించిన అరాచక, కిరాతక మూకలను ఏ విధంగా బీఆర్ఎస్ ఏరిపారేసిందో మీ అందరికీ తెలుసు. ఈ రోజు భువనగిరి ప్రజలు బ్రహ్మాండంగా శాంతియుతమైన జీవనం సాగిస్తున్నారన్నారు. ఇప్పుడు ఎన్నికలు వచ్చినప్పుడు ఆగం కావొద్దని, మంచి చెడు ఆలోచించి ఓటు వేయండి. ఉద్వేగంలో కొట్టుకొనిపోయి ఓటేస్తే మన జీవితాలు తల్లకిందులవుతాయి. పైళ్ల శేఖర్ రెడ్డిని మరోసారి గెలిపించండి. బీఆర్ఎస్ మళ్లీ గెలిస్తే భువనగిరిలో ఐటీ పార్కులు ఏర్పాటు చేస్తాం.” అంటూ భువనగిరి ప్రజా ఆశీర్వాద సభలో కేసీఆర్ ప్రజల్ని కోరారు.
———————————————
జనగామ, భువనగిరి సభల విశేషాలు
– జనగామలో జరిగిన ప్రజా ఆశీర్వాద సభకు సుమారు 70 వేల మంది ప్రజలు హాజరయ్యారు.
– భారీ ఎత్తున సీఎం కేసీఆర్‌, జనగామ అభ్యర్థి పల్లా రాజేశ్వర్‌ రెడ్డి కటౌట్లు, హోర్డింగ్‌లు ఏర్పాటు
– సభా వేదికపై కేసీఆర్ సమక్షంలో బీఆర్ఎస్‌లో చేరిన పొన్నాల
– జనగామ సభ తర్వాత భువనగిరి సభకు హాజరైన సీఎం కేసీఆర్
– బోనాలు, బతుకమ్మలు, బైక్‌ ర్యాలీలతో.. కేసీఆర్‌కు భువనగిరి బీఆర్ఎస్‌ శ్రేణుల ఘన స్వాగతం
———————————————–