బతుకమ్మ పండుగతో సంబంధం లేకుండా…!

ఎన్నికల కోడ్ సరిగ్గా బతుకమ్మ పండుగ సమయంలో వచ్చే ఛాన్స్ ఉండడంతో .. ప్రభుత్వం పండుగకు సంబంధం లేకుండా నే ముందుగానే చీరలను పంపిణీ చేయాలని భావిస్తోంది. కాగా, బతుకమ్మ సంబరాలు అక్టోబర్ 15 నుంచి మొదలుకానున్నాయి. అప్పటి వరకు చీరల పంపిణీని ఆపకుండా నెల రోజుల ముందు నుంచే స్టార్ట్ చేసి కోడ్ రావడం కంటే ముందే ఫినిష్ చేయాలని ప్రభుత్వం కసరత్తు మొదలుపెట్టింది.

తయారీకి ముమ్మర కసరత్తు..!

ప్రభుత్వం తీసుకున్న ఈ నిర్ణయంతో ఓ నెల రోజుల ముందే భారీగా బతుకమ్మ చీరలను తయారు చేయాల్సి ఉంది. సెప్టెంబర్ సెకండ్ వీక్ కల్లా చీరలు రెడీ కావాలి. అప్పుడే జిల్లా, మండల కేంద్రాల నుంచి గ్రామాలకు తరలించడం సాధ్యపడుతుంది. ఇక సెప్టెంబర్ నెల మధ్యలో నుంచి చీరల పంపిణీని ప్రారంభించినా.. అక్టోబర్ ఫస్ట్ వీక్ లో పూర్తి అవుతుంది. దీని కోసం వర్క్ వేగవంతంగా జరుగుతోంది. ఇప్పటికే ప్రభుత్వం నుంచి అర్డర్లను అందుకున్న వారు మరమగ్గాల్లో పని మొదలు పెట్టారు. దీని కోసం పవర్ లూమ్స్ రెండు, మూడు షిప్టుల్లో కూడా పని చేస్తున్నాయి. దాదాపు గా 25 వేల మరమగ్గాలపై 15 వేల మంది పనిచేస్తున్నట్లు సిరిసిల్ల నేతన్నలు వివరించారు. అయితే ఈ సారి కోటికి పైగా బతుకమ్మ చీరలను పంపిణీ చేయాలని ప్రభుత్వం టార్గెట్ పెట్టుకుంది.

బతుకమ్మ చీరల కోసం 340 కోట్లు..!

బతుకమ్మ చీరల కోసం ప్రభుత్వం 340 కోట్లు ఖర్చు చేస్తోంది. అయితే లాస్ట్ ఇయర్ చీరల నాణ్యత, డిజైన్ విషయంలో మహిళల నుంచి తీవ్ర స్థాయిలో వ్యతిరేకత వచ్చింది. అయితే ఈసారి ఎన్నికల సమయం కావడంతో ఆ విషయంలో ప్రభుత్వం అన్నీ జాగ్రత్తలు తీసుకునే పనిలో పడింది. ఇప్పటికే చీరల తయారీకి అవసరమైన ముడిసరుకులన్నీ సిద్ధంగా ఉండడంతో అధికారులకు కాస్త ఉపశమనం దొరికింది. మొత్తం 240 డిజైన్లు ఈ సారి బతుకమ్మ చీరలకు సిద్ధమయ్యాయి. అయితే ఒక వేళ ఎక్కడైనా వ్యతిరేకత వస్తే.. ఆ ప్రాంతాల్లో వెంటనే సర్దుబాటు చర్యలు కూడా చేపట్టాలని ప్రభుత్వం భావిస్తోంది. అందుకోసం సాధ్యమైనంత త్వరగానే బతుకమ్మ చీరలను పంపిణీ చేయాలని ప్రభుత్వం ముమ్మర కరసత్తు చేస్తోంది.