రాయలసీమలోని కొన్ని ప్రాంతాల్లో ప్రతి ఏడాది వజ్రాల వేట భారీగానే సాగుతుంది. తొలకరి వర్షాలు ప్రారంభం కాగానే.. చాలా మంది ప్రజలు పొలాల వెంబడి తిరుగుతూ వజ్రాల వేట సాగిస్తారు. ఈ క్రమంలోనే ఇటీవల కర్నూలు జిల్లాకు చెందిన ఓ రైతు పంట పండింది. పొలం పనులు చేస్తుండగా వజ్రం దొరికింది. జిల్లాలోని మద్దెకర మండలం బసినేపల్లి గ్రామంలో ఓ రైతుకు అత్యంత విలువైన వజ్రం దొరికింది. దానిని అమ్మకానికి పెట్టగా కొనడానికి వ్యాపారులు పోటీపడ్డారు. గతంలో కూడా కర్నూలు జిల్లాలోని తుగ్గలి మండలం పగిడిరాయి, బొల్లవానిపల్లె పొలాల్లో ఇద్దరికి రెండు వజ్రాలు దొరికాయి. ఇక అనంతపురంలోనూ అనేక మంది రైతులకు వజ్రాలు లభించాయి. అంతకుముందు చిన్న జొన్నగిరికి చెందిన ఓ రైతుకు ఏకంగా కోటి 20 లక్షల రూపాయల విలువైన వజ్రం లభించిందని తెలుస్తోంది.

సాధారణంగా వర్షాకాలం ప్రారంభంలో వజ్రాలు దొరుకుతూనే ఉంటాయి. దొరికిన వజ్రాన్ని స్థానికంగా ఉన్న వ్యాపారులు అక్కడే కొనేస్తుంటారు. వజ్రం బరువు ఎంత ఉందో.. ఎన్ని క్యారెట్లు ఉందో.. వజ్రం ఎలాంటి క్వాలిటీ లాంటి విషయాలు చెప్పకుండానే తక్కువ ధరకు స్థానికుల నుంచి కొని క్యాష్ చేసుకుంటూ ఉంటారు. ఈ నేపథ్యంలో కేంద్ర ప్రభుత్వం కూడా రాయలసీమ జిల్లాలలో వజ్రాల నిక్షేపాల కోసం అన్వేషణ చేసింది. ఈ క్రమంలోనే రాయలసీమలో బంగారు నిక్షేపాలు ఉన్నట్లుగా గుర్తించింది. 2013లో బంగారం నిక్షేపాల వెలికితీతకు జియో మైసూర్ సర్వీస్ ప్రైవేట్ లిమిటెడ్ కంపెనీకి అనుమతి ఇచ్చిన సంగతి తెలిసిందే.