పుంగనూరు, అంగళ్లు ఘటనల్లో పార్టీ అధినేత చంద్రబాబుతో సహా వందల మంది టీడీపీ నేతలు, కార్యకర్తలపై పోలీసులు కేసులు నమోదు చేశారు. ఇప్పటి వరకు 12 ఎఫ్ ఐఆర్ లు నమోదు, 317 మందిపై హత్యాయత్నం సహా పలు సెక్షన్ లతో కేసులు బుక్ చేశారు. ఇప్పటికే 81 మందిని అరెస్టు చేసి రిమాండ్ కు తరలించారు.దీంతో పెద్ద ఎత్తున అరెస్టులతో బాధితుల కుటుంబ సభ్యుల ఆవేదన, ఆందోళన నెలకొంది. ఈ నేపథ్యంలో అరెస్ట్ అయిన పార్టీ కార్యకర్తల కుటుంబ సభ్యులతో టీడీపీ అధినేత చంద్రబాబు ఫోన్ లో మాట్లాడి వారికి ధైర్యం ఇచ్చారు.

కాగా మరోవైపు సాగునీటి ప్రాజెక్టుల విధ్వంసంపై ‘యుద్ధభేరి’ పేరుతో ఈ నెల 1వ తేదీన చంద్రబాబు నాయుడు పర్యటన ప్రారంభించిన విషయం తెలిసిందే. ఇప్పటికే 9 రోజులు పూర్తి చేసుకున్న ఈ యుద్ధభేరి కార్యక్రమంలో నేటితో 10వ రోజుకు చేరుకుంది. ఈ 10వ రోజున చంద్రబాబు శ్రీకాకుళం జిల్లా కొత్తూరు మండలం గూనభద్రలో పర్యటించారు. పర్యటనలో భాగంగా ఆయన వంశధార ప్రాజెక్టును సందర్శించి, పరిశీలించి సెల్ఫీ ఛాలెంజ్ విసిరారు.